|
|||||||
|
|
|
|||||
|
|
|||||||
رباعيات صلاح جاهين
مع إن كل الخلق من
أصل طين
وكلهـم بينــزلوا
مْغَمَّضـيـن
بعد الدقايق
والشهور والسنين
تلاقى ناس أَشرار
وناس طيبين
عجبى !!
***
ولدى نصحتك لما صوت
اتَنَبح
ما تخافش من جِنِّى
ولا من شَبَح
وإن هبّ فيك عفريت
قتيل إسأَله
ما دافعش ليه عن
نفسه يوم ما اندبح ؟
عجبى !!
***
ياما
صادفت صحاب و ما صحبتهمش
و
كاسات خمور وشراب ومشربتهمش
أندم
علي الفرص اللي أنا سبتهم
والا
الفرص اللي ما سبتهمش
عجبى!!
***
سهير ليالي و يا ما
لفيت وطفت
وف ليله راجع في
الضلام قمت شفت
الخوف..كأنه كلب سد
الطريق
وكنت عاوز اقتله..
بس خفت
عجبى!!
***
اقلع غماك يا تور
وارفض تلف
اكسر تروس الساقية
واشتم وتف
قال : بس خطوه كمان..
و خطوه كمان..
يا أوصل نهاية
الساقية يا البير يجف
عجبى!!
***
كان فيه زمان
سِحليَّة طول فَرْسَخين
كهفين عيونها
وخَشْمَها بَربخين
ماتت .. لكين الرعب
لم عمره مات
مع إنه فات بدل
التاريخ تاريخين
عجبى !!
***
نظرت فى الملكوت
كتير وانشغلت
وبكل كلمة ( ليه ؟) و
( عشانيه ) سألت
اسأل سؤال ... الرد
يرجع سؤال
واخرج وحيرتى أشد
مما دخلت
عجبى !!
***
يوم قلت آه ..
سمعوني قالوا فسد
ده كان جدع قلبه
حديد واتحسد
رديت علي اللايمين
أنا وقلت.. آه
لو تعرفوا معني
زئير الأسد
عجبى!!
***
أنا كل يوم أسمع..فلان
عذبوه
أسرح في بغداد و
الجزاير وأتوه
ما اعجبش م اللي
يطيق بجسمه العذاب
واعجب من اللي يطيق
يعذب أخوه
عجبى!!
***
اعرف عيون هي
الجمال و الحسن
و اعرف عيون تاخد
القلوب بالحضن
و عيون مخيفة
وقاسيه و عيون كتير
و بحس فيهم كلهم
بالحزن
عجبى!!
***
بين موت وموت ... بين
النيران والنيران
ع الحبل ماشيين
الشجاع والجبان
عجبى عَلادى حياة ..
وياللعجب
إزاى أنا ـ يا تخين
ـ بقيت بهلوان
عجبى !!
***
دخل الربيع يضحك
لقانى حزين
نده الربيع على
إسمى لم قلت مين
حط الربيع أزهاره
جنبى وراح
وإيش تعمل الأزهار
للمَيتين
عجبى !!
***
ليه يا حبيبتى ما
بيننا دايماً سفر
ده البعد ذنب كبير
لا يغتفر
ليه يا حبيبتى ما
بيننا دايماً بحور
أعدى بحر ألاقى
غيره اتحفر
عجبى !!
***
الفيلسوف قاعد
يفكر سِيبوه
لا تعملوه سلطان
ولا تصلبوه
ما تعرفوش إن
الفلاسفة ياهوه
اللى يقولوه
بيرجعوا يكدّبوه ؟
عجبى !!
***
يا للي نصحت الناس
بشرب النبيت
مع بنت حلوه..و عود,
وضحك ,وحديت
مش كنت تنصحهم منين
يكسبوا
تمن ده كله؟...والا
يمكن نسيت
عجبى!!
***
السم لو كان فى
الدوا .. منين يضر ؟
والموت .. ولو
لعدونا .. منين يُسرّ ؟
حُط القلم فى الحبر
واكتب كمان
... والعبد للشهوات
.. منين هو حُرّ
وعجبى !!
***
سرداب فى مستشفى
الولادة طويل
صرخات عذاب ورا كل
باب وعويل
... وفى الطريق
متزوقين البنات
متزوقين للحب
والمواويل
وعجبى !!
***
الدنيا من غير
الربيع ميّته
ورقة شجر ضعفانة
ومفتته
- لأ يا جدع غلطان
تأمّل وشوف
زهر الشتا طالع فى
عز الشتا
عجبى !!
***
يا عندليب ما تخافش
من غنوتك
قول شكوتك واحكي عل
بلوتك
الغنوه مش حتموتك
إنما
كتم الغنا هو اللي
حيموتك
عجبى!!
***
ياللى انت بيتك قش
مفروش بريش
تقوى عليه الريح .
يصبح مفيش
عجبى عليك حواليك
مخالب كبار
وما لكش غير منقار
وقادر تعيش
عجبى !!
***
قالوا الشقيق بيمص
دم الشقيق
والناس ما هيَّاش
ناس بحق وحقيق
قلبى رميته وجبت
غيره حجر
داب الحجر .. ورجعت
قلبى رقيق
عجبى !!
***
كيف شفت قلبى
والنبى يا طبيب
هَمَد ومات والا
سامع له دبيب
قاللى لقيته مختنق
بالدموع
ومالوش دوا غير
لمسه من إيد حبيب
عجبى!!
***
حدوته عن جعران وعن
خُنفسه
اتقابلوا حَبّوا
بعض ساعة مِسَا
ولا قالهم حد
اختشوا عيب حرام
ولا حد قال دى
علاقة متدنسة
عجبى !!
***
زحام وأبواق
سيارات مزعجة
إللى يطول له رصيف
.. يبقى نجا
لو كنت جنبى يا
حبيبى أنا
مش كنت أشوف إن
الحياة مُبهجة ؟
عجبى !!
***
بلياتشو قال إيه بس
فايدة فنونى ؟
وتلات وقق مساحيق
بيلوّنونى
والطبل والمزمامير
وكتر الجعير
إذا كان جنون زبونى
زاد عن جنونى
عجبى !!
***
حتة محارة وجدتها
فى يوم لقيةّ
قالت لى شوف كيف
الطبيعة شقية ؟
نظرت للكهف اللى
فيها ولقيت
إن الطبيعة كمان ..
لا أخلاقية
عجبى !!
***
غمض عينيك وارقص
بخفة ودلع
الدنيا هى الشابّة
وانت الجدع
تشوف رشاقة خطوتك
تعبدك
لكن انت لو بصيت
لرجليك .. تقع
عجبى!!
***
ورد ف ورق سلوفان
يا حلوة اهديلك ؟
والاّ انقله
بالطين فى شتلة واجيلك ؟
الأولانى لــو
وحـــا بحنـانـى
عجبى على التانى
بإيه يوحيلك ؟
عجبى !!
***
ولدى إليك بدل
البالون ميت بالون
انفخ وطرقع فيه على
كل لون
عساك تشوف بعنيك
مصير الرجال
المنفوخين فى
السترة والبنطلون
عجبى !!
***
برّه القزاز كان
غيم وأَمطار وبرق
ما يهمنيش ـ أنا
قلت ـ ولا عندى فرق
غيّــرت رأيـى بعد
ساعـة زمـان
وكنت فى الشارع ..
وفى الجزمة خرق
عجبى !!
***
عينى رأَت مولود
على كتف أُمه
يصرُخ تهنِّن فيه
يصرخ تضمُّه
يصرخ تقول يا بْنى
ما تنطق كلام
ده اللى ما يتكلمش
يا كتر همُّه
عجبى!!
***
لا تجبر الإنسان
ولا تخيّره
يكفيه ما فيه من
عقل بيحيَّره
اللى النهارده
بيطلبه ويشتهيه
هو اللى بكره ح
يشتهى يغيّره
عجبى !!
***
علم الَلَوع أضخم
كتاب فى الأرض
يس اللى يغلط فيه
يجيبه الأرض
أما الصراحة
فأمرها ساهل
لكن لا تجلب مال
ولاتصون عرض
عجبى !!
***
قطى العزيز راقد
على الكنبات
فى نوم لذيذ ..
وبيلحس الشنبات
وانا كلّ عين فنجان
مدلدق قلق
صدق اللى قال إن
الحياة منابات
عجبى !!
***
قالوا السياسة
مهلكة بشكل عام
وبحورها يا بنى
خشنة مش ريش نعام
غوص فيها تلقى
الغرقانين كلهم
شايلين غنايم .
والخفيف اللى عام
عجبى !!
***
أهوى الهوى وهمس
الهوى فى العيون
وبسمة المغرم .
ودمعة الحنون
وزلزلات الحب نهـد
الصبـا
أكون أنا المحبوب .
أو لا أكون
عجبى !!
***
عيد والعيال
اتنططوا ع القبور
لعبوا استغماية .
ولعبوا بابور
وباللونات .
ونايلونات شفتسى
والحزن ح يروح فين
جنب السرور
عجبى !!
***
ياللي
بتبحث عن اله تعبده..
بحث
الغريق عن أي شيء ينجده
الله
جميل و عليم ورحمن ورحيم
احمل
صفاته...وأنت راح توجده
عجبي..!
***
يا نجم...نورك ليه
كده بيرتجف؟
هو أنت قنديل زيت؟...
أو تختلف؟
أنا نجم عالي...بس
عالي قوي
و كل ما انظر تحت
أخاف أنحدف
عجبى!!
***
يا خالق الكون
بالحساب والجبر
وخالقني ..ماشي
بالاختيار و الجبر
كل اللي حيلتي
زمزميه أمل
و ازاي تكفيني لحد
باب القبر؟
عجبى!!
***********
